The Moment 這一刻

今日下午，和三位女友茶聚，紫最近遇上騎呢怪。其實她上次己經告訴過我了，我只是追問進展。話說，紫是個很有規律的人，每天十時半就會到PANTRY拿 朱古力奶喝，她說其中一個秃頭的男同事，喜歡了她，每日都在十時半為她準備一盒熱的朱古力奶，放到她的桌上，然後用SMS問她:「何時才能約妳去街?」紫道了一句差點令我笑死，她說：「佢憑咩覺得我會鍾意佢呢？我真係唔明。」我笑問：「除咗秃頭之外，仲有咩問題先？妳唔好人身攻擊人先得架!」 她說:「矮! 我鍾意高大的男仔，我著高踭鞋會高佢好多架！」其實紫跟我差不多高，我諗高我少少，所以我說：「咁佢真係好矮喎！」

我說：「我最近都遇到騎呢怪呀！我公司隔離部門有2個騎呢怪，一個就痴線既，係咁喺FACEBOOK ADD我，我唔識佢架！另一個就新請返黎既， 有次喺走廊，佢截停咗我，無啦啦問我－－妳記唔記得我呀？妳INTERVIEW過我架!多謝妳俾機會我呀! 我當堂啞咗，果日係RECRUITMENT DAY我只係負責IN佢地D語言能力，如果我早知佢咁騎呢我就FAIL佢啦! 我O 晒口嘴，然後笑笑口話咁你俾心機做啦！諗住佢份人擦鞋啫，無乜嘢，點知佢每一次見到我，都係咁搵話題同我講嘢，都係度扮熟。佢喺左邊，我望右邊，己經好用力地扮睇佢唔到，但佢都係唔死心，成日都搵嘢講．．．．我真係覺得好煩！」這時候， 林太說:「死啦，我諗佢當咗妳係女神！」我碌大自己那人雙只有1CM直徑的細小眼睛，然後話：「唔係吓話？唔好搵啲咁既嘢玩好喎！」

眾女友齊聲哈哈笑過後，林太說:「騎呢人，我都遇過。果個係郵差叔叔黎架，我果時要兼做埋RECEPTIONIST，每日佢送信，都係我幫佢CHOP 印，見佢係一個大叔，我都幾好禮貌，點知有一次，呢個郵差叔叔，真係叔叔（林太好強調，起碼成四十幾歲的！），無啦啦講起佢會同啲廿幾歲既後生女去海洋公園，然後就問：妳幾時得閒同我去睇場戲呀？」林太講到呢度，我真係忍唔住笑到氣咳同埋要打斷佢既話柄，問：「去海洋公園同約妳睇戲有咩關係呀？一啲都唔連貫喎，個大叔好唔掂！」然後林太話，簡直係恐怖，從此以後每次郵差叔叔送信，佢都匿埋，仲話家下見到綠色都驚喎！笑鬼死，紫問：「妳有無話俾老公聽？」林太：「林生笑死咗！」我地話：「林生一啲危機意識都無！妳又係既，郵差叔叔應該改為”靚仔郵差哥哥” 吖嘛！佢即刻管接管送啦！」

騎呢人的話題完結後，眾友到滿記吃甜品，紫說：「揀男人最重要是睇個相！」林太話最重要生肖夾。我向來不迷信，但有興趣聽吓，紫道：「眉尾散、笑時有　魚尾紋的男人要不得。」然後她們一直地談，我一直在聽，差不多要轉話題的時候，紫笑得衰衰地道：「哎呀，仲有一樣嘢要睇。」我問：「睇咩呀？」她說：「手指，台灣的小S 話很多台灣女仔証實咗男人的手指長短粗幼能反映出那話兒的實況!」這時，甚少作聲的凡說：「林太，妳返去睇下林生啲手指咪知準唔準　　　　　　　囉！」我地一齊話：「好心妳啦，搞到林太幾咁尷尬！」林太說：「以後我叫我老公包實隻手先好見妳地！」我說：「紫，我們以後千萬別帶男朋友出現，費時佢啲手指俾人睇蝕晒！」　紫說：「我就唔係咁諗喇，如果佢啲手指生得靚，俾你地睇有乜所謂呀！」笑死！佢地仲話聽日返工會密切留意男同事的手指添～　基於凡令到林太咁尷尬，我說:「其實凡你都可以睇下你男友的手指．．．．咁咪可以PROVE到準唔準囉!」 紫笑到氣絕身亡咁滯，佢話以後一睇男仔隻手，就可以話：「你係牙籤仔！」我地啲對話真係賤到無人有．．．．哈哈哈．．．好RELAX同無聊的週日。