The Moment 這一刻

突然看到有篇轉載文章，叫＜空姐的碎碎念＞，剛好我今天想寫點關於一個地勤人員的事兒，在這篇文的激勵下，我就發揮有限度的小宇宙，寫一寫吧！

• 做過不同部門，先講check-in，最早要返0500，有通宵龍運巴士由巿區入機場，但在像「雪櫃」一樣的龍運巴坐上個幾小時左兜右兜隔了半個世紀才回到機場，我會很沮喪。其實swire有專車提供給同事在irregular hours上班之用，收費比龍運巴便宜。
• 最痛苦莫過於返0500時，早上0300起床，擦牙洗臉換衫化妝梳頭再衝落樓下坐通宵小巴到荃灣／或在0400 的士佬交更，十級難截的士的時候搵的士，務必令自己能撘上0417的swire冠忠巴士。
• 每逢八號風球、黑雨或天氣不穩時，被客罵已經習慣，最攞命係架輕飄飄似玩具既龍運巴喺青馬大橋上飛馳既感覺，我真係感覺到架巴士隨時會翻側，我好可能會無命。
• 冬天零晨四時，站在路邊等車，隊尾是一檔報紙檔，我常盤算，假如不做地勤，我應該可以去賣報紙。
• 大時大節，諸如聖誕平安夜過後，我在零晨4點幾等車返工，你地班死靚仔玩通頂，以望奇珍異獸般的目光把在等車一動也不動的我由頭望到落腳，果一刻，有衝動求其搵個人嫁咗佢算。
  

• 最憎著制服上下班，不著制服，被麻甩佬搔擾的指數是零，著制服後被滋擾的指數是100。
• 有段時間，公司未有locker提供，著制服等巴士的我，被口痕友道：「嘩，空姐，正啊！」十個嬲怒，我勁想講我不是空姐，同時十分佩服著制服去行街或到超巿買嘢的女同事們。（妳們真的好有勇氣！）
• 請不要當我們是check-in機械人，我們也是人，講多一兩句「唔該」，係唔會死的，我地會很高興。
• 請不要把所有跟你們航程有關的東西都問我，我不是百科全書。你間travel agent為什麼不幫你book某個sub-class，你的機票為何會這樣那樣，我想不應該是你付錢後才問的問題。
• 請不要再問我一些白痴問題，例如，flight time幾多，你會唔會因為flight time 3小時太長而突然決定唔飛?唔會囉。
• 請不要把舊的行李牌一直緊緊地貼&掛在你的行李箱上 ，因為我不是你家裡的賓賓，沒有責任替沒手尾的你撕掉那張發黃、後面貼紙溶掉到立痴痴的行李牌。更不要以為把整個行李箱／篋貼滿舊的貼紙是好型的行為，這是上了年紀的旅行團領隊才會做的白痴行為。
• 請務必記清楚你們所屬的membership entitlement，不要再跟我們爭拗，priority tag等小事我們可以作主，只要你禮貌地要求，我從不吝嗇送你。但請禮貌地提出你的要求，而不是呼喝我。
• 請知道loading officer也是人來的，人有極限，行李不要裝超過32kgs，人家也是靠雙手搵飯食的。
• 如果你們是夫婦、朋友、家人，我未能為你們安排坐在一起，這是我的安排不週，當然也是因為飛機滿客的原故，你罵我或抱怨我都可以接受。但是，如果你們是兩個獨立的男士，我未能為你們安排坐在一起，而你們竟向我發難，我有足夠的理由懷疑你們的性取向。
• 因為你是老人家，跟所以要坐得前一點，其實是一點關係都沒有。不過，我敬老，所以沒所謂。
• 遲到的人，總愛把責任推到我們的身上，說我們check得太慢，然後破口大罵並黑面。
• 還在跟師的時候，用了個很笨的方法幫一個遲到的乘客，被鬼婆一直罵我stupid，最後她上到機，而我回到counter跟我的師父說起這事不自覺地眼濕濕。
• 現在，被罵的時候幾乎可以笑出來。面皮厚了，人也老了。又或者人變得老練，就能減少被罵的機會。
• 最討厭被喝罵：「妳傻架！」同事說，不如回應：「我係傻架，不過而家好返，都七七八八架喇！你見我都返到工吖！」並附加白痴妹笑臉乙個。
• 小姐，點解你check得咁慢架?究竟係你有問題定係部電腦有問題呀? — 又唔知自己拎埋d騎呢護照，仲要申請埋啲single entry既visa，我係咁同佢數中國出入境印都數到傻咗，一係就訂完位無報ticket no.，個booking俾人cancel咗，或者張電子機票又唔associate with個booking，仲要佢想要的位又無鬼咗，等等下搞搞下咪咁耐囉。咁其實會唔會係你有問題呢，先生？
• 唔好再問我，今日serve乜餐，我真係唔係空姐呢．．．．係咪一定係hot meal，有無牛雞豬，我真係唔知。仲有，好耐唔見果位士多啤梨小姐。有位小姐，每次來必問：「今日你地既雪糕有無serve士多啤梨味?無既話，幫我make 個order。」我：「吓，我地唔知架喎，要打電話去catering幫你問。」小姐：「咁你仲唔問？」我問完之後，我好肯定接我電話個同事收線之後係咁媽媽聲。
• 唔好再講：「點解你地block起晒d位唔賣?」–無，我地真係無block位，你所指既block位，其實係會員訂咗既位，佢no show，你上到機咪見到有空位囉，唔係我地block起的。
• 至於「點解會員就可以訂位，唔係會員唔係人呀？我買full fare y class架!」well，世界就係咁唔公平架啦，咁大個人都唔化既！
• 我好憎去ferry terminal，要同啲大陸同胞一架車出入10號閘，個感覺想死。佢地啲手提行李多到可以壓死我，同埋我好肯定每次傷風感冒都係佢地唔掩口咁咳同打噴嚏傳染俾我的。
• 做airside時，好憎叫啲客寄佢地的手提行李，但無辦法，鬼叫airbus a320/321既設計咁仆街。當我在機口禮貌周周地問可否寄手提行李時，啲客成日都話：「我個篋入面全部都係錢黎架，唔見咗你賠得起咩？」佢地例牌再用雙眼睥一睥我，道：「小姐，我問妳呀，妳賠唔賠得起呀？寄咗佢喎？你都痴線既！」（尾果幾粒字通常都越講越大聲，引起其他乘客的注意。）我一般會應佢：「如果真係唔方便寄的話，咁由佢啦，不過呢，如果因為機艙入面太細而overhead locker又唔夠位放，captain話要寄的話，我地都可以幫你寄咗件行李的，全程都係人手拎落機底寄，唔會寄失的，你可以放心。」
• 接上句，但更常做的手法是，向外藉人士埋手，他們一般都比較講理，肯寄咗佢個名牌手提篋，仲thank you前thank you後，我咁做，務求做到強烈對比，令那個拎住cheap雞牌既手提篋男人無地自容。
• 做airside時，接機最怕接大陸機，唔明點解國內同胞無一種同人保持適量距離的意識。佢地總會越企越埋，埋到有幾次我要退後。
• 在機口，經常被鬧的是，flight delay，鬧到無嘢好鬧，就話你講大話，人地都無atc hold或人地天氣唔好都照飛等等。
• 講開天氣唔好都照飛，話說有個客又係咁講，話乜鬼唔坐你地，轉坐另一間。同事串串貢地答：「幫你睇睇先，咦，先生你張飛可以改坐其他航空公司架，包括你頭先講想坐果間。吖，話聲俾你聽，咁啱果間航空公司尋日有隻喺台灣跌咗落黎。無乜嘢既。」個客嚇到即刻收聲坐返我地。我好欣賞呢個同事串得黎，係輕描淡寫咁講飛機失事。真有趣。
• 我覺得冬天夏天都是短袖連身裙，外加超透風長袖外套，其實係好唔人道，因為真係好ｘ凍。
• 諗諗吓，成日都俾客屈我講大話，如果我講大話咁叻，似乎都可以去做最佳女主角。
• 可唔可以，唔好再問我，小姐，點解你地間航空公司咁差架？呢啲咁深奧既問題，我要轉交ceo先可以答覆你，但你知啦，我只係一個小小既地勤人員，又點會轉交到ceo呢?所以這個問題，係一直都唔會有答案。
• 我：「請問想坐咩位？」客：「我想坐第一行路邊，但不要中間4人位的路邊喎！」心諗，一次滿足你三個願望，你估我係kinda出奇蛋咩? 最爆笑的答：「我想坐機師位。」仲要問：「咁我似唔似機師先？」
• 做過dispatcher的工作，要在乘客disembarked之後，拿著flight plan、fuel order同weather report上去cockpit，因為係combi機，個cockpit係樓上的，是boeing 747 (改正了，感謝ball叔與kickin8) 那條樓梯太直了，走到一半，我其中一隻鞋子甩了出來，就像灰姑娘一樣，被空姐見到笑了很久。
• 也是做dispatcher的時候，機門一打開，乘客走後，那個captain一推開度門就立即從後環抱著purser，我見到後嚇了一大跳，只能退後兩步，外藉的他問：「你很害怕嗎？」我坦言：「係呀！」心諗梗係驚啦。
• 有時候會沒心情吃飯，真的，但不知道為什麼。
• 有時候會懷疑自己有抑鬱症。
• 做oz時，要上夜班的。那時，晚上8點開counter，沒有那麼多乘客知道early check-in service，我和同事都是邊吹水邊度日，或者邊唱歌邊度日，唱歌？係，我地都好堅的。
• 同一個時段，旁邊的法航已經人頭湧湧，那些機場特警總是把目光放在check-in counter的女仔身上多過啲客身上。有過最無厘頭的搭訕，同事話有個mr.特警係咁望著我倆，我以為佢望我同事，點知佢趁我同事行開，走過黎再望多一輪，跟住問：「你地係咪日日都係8點開counter架?」我超級愕然，答：「係．．．呀」佢仲想講嘢，我即刻dup低頭扮check load同做嘢，無理佢。心諗，係日日都8點開，但唔一定係我開囉。
• 其實我鐘意terminal 1多過2。
• 其實我覺得返機場好大機會嫁唔出。
• 見得人越多，越覺得人好恐怖。
• 放工後(0130之後)，我其實好鐘意同啲同事去食宵夜，或者唱k。
• 試過返0500–1430，同一個同事＆佢男友去唱k，結果我地兩個攰到訓著咗，佢男友一個人唱晒，唔使爭咪。
• 想做地勤既人，我奉勸大家三思，並從頭到尾睇多一次。

多謝各位！