The Moment 這一刻

生日．．．．很快樂！

多謝各位美女＆俊男！

連續兩晚的生日飯，以及下星期一的生日飯都是吃西餐，難道本人是名乎其實的「西人」？（爛gag）

其實兩晚的晚飯中，與沒有定期聚會的好友暢談一番，甚是歡慰。其中更有不少惹笑的對話，惟內容涉及不雅成份，暫且不在本blog中透露，以免破壞本人在blog友們心中的高雅形象。(哈哈哈哈)

不過委實想節錄兩段對話內容－－

跟中學友好吃飯那晚，被拷問有甚麼生日願望，我認為這個問題比男生問我愛不愛他更難答，因為我要開宗明義講句，小汀實在是個很貪心的港女，得一想二是我的缺點，但要我這麼誠實把心中好幾個生日願望一一列出，我怕她們會睡著或不斷呃紅酒飲解悶，於是我從簡，答了－－想拍拖。這時候，身旁的友人立即提高聲調問：「妳不是想結婚嗎？為什麼是拍拖而不是結婚呢？」我只答道：「我想拍拖先。」心想，我只是求其答，根本忙到沒時間諗生日願望，想了三十秒，又真的沒甚麼願望，我又不是選港姐，不用許世界和平這種宏願吧。認真的，今年是唯一一年，我忘記了自己的生日，只一心諗住快啲25號啦，快啲出糧就好喇。証明了年紀越大，人越現實囉，似乎都是一件好的事呀！煩少好多無謂嘢。

第二晚收工後，與sharon及師姐相遇，她們極驚訝地問：「小au ,妳點解唔request 正日day off?」我咬牙切齒地答：「唔好再提喇，我家陣已經極度後悔。今朝被個客黑我面，同發我脾氣，即刻灰晒。」師姐同sharon一致地道：「話咗妳架啦，生日一定要request off架，我以前都唔信架！」我話：「咁我諗住無街去又無乜嘢做，咪返吓工囉，返工見到啲同事開心啲嘛．．．點知啫．．．．點知會咁架啫．．．．．」師姐話:「錯呀，完全錯晒，喺生日果日俾客皮（發脾氣）個感受係超級強烈架！」我話：「而家我咪知囉．．．．所以，我都發咗xx同xx (上司)脾氣，哈哈哈~~~~~~~~~~」

後記：每次同師姐食飯，都會有好多金句，我真係好鐘意尋晚呢句－－「如果你唔靚，喺check-in counter，你肯定死得好慘。」仲有呢句－－「女仔最緊要係咩呀？係個樣呀。（加強語氣）我講真架，至緊要係搵個好老公。（認真地）樣真係好緊要，所以我成日叫啲新人唔好捱殘自己。」

後記2: 其實我覺得我不是偶像派，要扮偶像派，很吃力囉！XDD